Bretar og ESB á barmi viðskiptastríðs við Ísland og Færeyjar

13. desember 2010 10:29

Breska blaðið Indepentent segir í frétt í dag að Bretar og Evrópusambandið séu á barmi viðskiptastríðs við Ísland og Færeyjar vegna makríldeilunnar. Sumir séu þegar farnir að ræða um málið sem Þorskastríð númer tvö.

Fram kemur í fréttinni að búist sé við að Evrópusambandið muni grípa til refsiaðgerða gegn Íslandi og Færeyjum vegna einhliða ákvörðunnar þessara þjóða um að taka sér stóraukinn makrílkvóta. Hótanir séu uppi um að setja innflutningsbann á þorsk, síld, ufsa, ýsu og makríl frá Íslandi og Færeyjum.

Árleg fiskveiðiráðstefna Evrópusambandsins hefst í Brussel í dag þar sem makríldeilan verður m.a. í brennidepli.

Richard Benyon umhverfis- og sjávarútvegsráðherra Bretlands segir í samtali við blaðið að skortur á samningi við Ísland og Færeyjar um makrílveiðarnar séu mikil ógn við stöðugleika stofnsins. Bretar séu að íhuga til hvaða aðgerða hægt sé að grípa til að Ísland og Færeyjar sjái skynsemina í því að semja um veiðarnar.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.