Byssumaður biðst afsökunar - ætlar í meðferð

„Að gefnu tilefni játa ég að mér urðu á persónuleg mistök síðastliðið sunnudagskvöld sem ég ber einn ábyrgð á," segir Páll Reynisson, sem var handtekinn um helgina eftir að hann hafði skotið af skammbyssum og haft í hótunum við lögreglumenn. Hann var ölvaður þegar atvikið átti sér stað.

Lögreglan krafðist gæsluvarðhalds yfir Páli og að hann gengist undir geðmat. Héraðsdómur Suðurlands féllst ekki á kröfu lögreglustjórans.

Páll rekur veiðisafn á Stokkseyri og á yfir níutíu byssur. Þær voru gerðar upptækar eftir atvikið auk þess sem hann var sviptur vopnaleyfi til bráðabirgða.

Hann hefur hinsvegar kært þá ákvörðun og verður það mál tekið fyrir í Héraðsdómi Suðurlands í vikunni.

Páll sér mikið eftir gjörðum sínum og segir í yfirlýsingu sem hann sendi frá sér:

„Ég bið þá fyrirgefningar sem ég kann að hafa hryggt eða valdið ótta eða vonbrigðum með hegðun minni. Ég hef ákveðið að leita mér hjálpar við vanda mínum og er nú á leiðinni í áfengismeðferð."

Þá segir Páll að mistök sín séu Veiðisafninu á Stokkseyri óviðkomandi.

„Það verður áfram opið og þar geta safngestir áfram notið þess að skoða fjölbreyttasta safn villtra dýra á Íslandi sér til fróðleiks og ánægju," segir í yfirlýsingunni, en þar má finna fjölda dýra sem Páll hefur veitt í gegnum tíðina.