Ég hata þig ekki

„Ég hata þig ekki. Ég vil miklu frekar elska þig." sagði Sigurður Guðmundsson, 88 ára, við þýska kafbátahermanninn Horst Koske þegar þeir hittust í sýningarskála Íslands á bókamessunni í Frankfurt í dag. Koske, sem er 84 ára, er eini eftirlifandi meðlimur áhafnar þýska U300 kafbáts nasista sem skaut á og sökkti Goðafossi út af Garðskaga hinn 10. nóvember 1944. Sigurður er einn af þeim fjórum úr áhöfn Goðafoss sem enn er á lífi.

Sigurður og Koske voru leiddir saman í hádeginu þegar bók Óttars Sveinssonar, Útkall - árásin á Goðafoss, var kynnt. Óttar segir stundina hafa verið tilfinningaþrungna. ,,Þetta var óendanlega hjartnæm stund. Ég held að meirihluti þeirra sem sátu í salnum þéttskipuðum hafi fellt tár," segir Óttar.

Sigurður og Koske féllust í faðma og felldu sjálfir tár þegar þeir hittust fyrir framan salinn.

Goðafoss átti ekki langt í land þegar þýski kafbáturinn skaut á hann. Goðafoss var hluti af skipalest frá Bandaríkjunum. Tuttugu og fimm Íslendingar fórust og nítján björguðust. Jafnframt týndu nokkrir breskir skipbrotsmenn lífinu. Árásin á Goðafoss er talið vera eitt mesta áfall íslensku þjóðarinnar í seinni heimsstyrjöldinni.