Innlent

Einar Boom fær bætur

Einar Boom Marteinsson þegar hann var enn foringi Hells Angels.
Einar Boom Marteinsson þegar hann var enn foringi Hells Angels.
Héraðsdómur Reykjavíkur dæmdi íslenska ríkið til þess að greiða Einari „Boom" Marteinssyni 150 þúsund krónur í miskabætur fyrir símahlerun í morgun. Einar var hleraður þegar hann var foringi vélhjólasamtakanna Fáfnir sem síðar urðu Hells Angels. Hlerunin fór fram á mánaðartímabili árið 2009.

Símtæki Einars voru meðal annars hleruð þar sem hann tók á móti útlendum manni úr Hells Angels.

Hann var aldrei handtekinn grunaður um glæpinn sem lögreglan rannsakaði. Að lokum var símahlerunum hætt, það er að segja áður en heimild til þess rann út, þar sem lögreglan mat sem svo að slík hlustun þjónaði engum tilgangi.

Athygli vekur að dómari metur sem svo að það hafi verið skilyrði fyrir heimild til þess að hlera Einar, þar sem hann var þá leiðtogi samtaka sem eru skilgreind af lögreglu sem skipulögð glæpastarfsemi.

Það þýðir þó ekki að hlerunin sé undanskilin lögum um miskabætur. Svo segir orðrétt í dóminum:

„Stefnandi [Einar] var spurður um það við aðalmeðferð málsins hvernig honum hafi orðið við þegar hann komst að því að sími hans hafði verið hlustaður á árinu 2009. Hann svaraði því til að honum hefði liðið hræðilega, honum hafi fundist eins og sér hefði verið nauðgað. Þetta hefði verið hræðileg tilfinning. „Persónuleg símtöl og annað slíkt sem hann hafi verið að tala við konuna sína og aðra..."

Málskostnaður fellur niður.

Einar sat síðar í gæsluvarðhaldi í um hálft ár þegar hann var handtekinn í tengslum við árás í Hafnarfirði þar sem fjórir einstaklingar gengu hrottalega í skrokk á konu. Einar var sýknaður í því máli.




Fleiri fréttir

Sjá meira


×