Ekki betra að taka mikið lýsi

Guðrún Valgerður Skúladóttir, vísindamaður við Læknadeild Háskóla Íslands, hefur unnið að rannsóknum á áhrifum Ómega þrjú fitusýra á gáttatif eftir hjartaaðgerðir. Það er algengasta tegund hjartsláttartruflana. Hún segir að hvorki sé hollt að innbyrða of lítið af fitusýrum, né of mikið.

Orsakir gáttatifs eru ekki kunnar og síðustu ár hafa víða verið gerðar rannsóknir á því hvort hægt sé að meðhöndla það með því að gefa sjúklingum Ómega þrjú fitusýrur sem hafa sýnt sig að eru bólguhemjandi.

Niðurstöður úr rannsókn sem Guðrún hefur staðið að síðustu ár hér á landi voru nokkuð óvæntar. Þær sýna að hvorki sé gott að innbyrða of lítið af fitusýrum né of mikið. Guðrún var gestur í bítinu á Bylgjunni í morgun.

„Við sáum að þeir sem voru með mjög lítið af þessum Ómega 3 fitusýrum og mjög mikið fengu frekar gáttatif en þeir sem voru með Ómega fitusýrur í lagi,“ sagði Guðrún. „Það er með þetta eins og margt annað, það þarf ekki mikið. Það þarf að vera til staðar og þá hefur það kannski jákvæð áhrif,“ sagði Guðrún.

„Ég held að við vitum ekki nákvæmlega hversu mikið rétta magnið er. Alþjóða heilbrigðismálastofnunin ráðleggur einstaklingi að taka 300 til 500 milligrömm af Ómega 3 fitusýrum á dag. Þetta er sá dagskammtur sem er ráðlagður á lýsishylkjum. Ef við tökum fljótandi lýsi þá er ráðlagt að taka eina teskeið, sem eru um fimm millilítrar. Það inniheldur um 800 milligrömm af Ómega 3 fitusýrum.“

Þá telur Guðrún ekki ráðlagt að taka heila matskeið af lýsi á dag.