ESB ekki trúarbrögð innan Framsóknarflokksins

Sigmundur Davíð Gunnlaugsson segir að Framsóknarflokkurinn sé ekki aðeins valkostur fyrir þá sem eru andvígir aðild að Evrópusambandinu þótt hann sé sjálfur á móti aðild. Framsóknarflokkurinn sé opinn, ólíkt því sem gildi í Samfylkingunni þar sem litið sé á Evrópumálin sem trúarbrögð.

Guðmundur Steingrímsson, þingmaður Framsóknarflokksins, sagðist í fréttum okkar í gær bjóða Ásmund Einar Daðason, þingmann og formann Heimssýnar, velkominn í flokkinn en sagðist hafa áhyggjur af ásýnd flokksins og hvort sínar eigin hugsjónir ættu stað í Framsóknarflokknum áfram. Hann sagðist jafnframt hafa áhyggjur af því að miðjusækið, frjálslynt borgaralega þenkjandi fólk myndi hætta að styðja flokkinn.

Sigmundur Davíð Gunnlaugsson, formaður Framsóknarflokksins, er á móti aðild að Evrópusambandinu. Nýi þingmaðurinn er harður andstæðingar aðildar. En þýðir þetta að Framsóknarflokkurinn er orðinn skýr valkostur þeirra sem eru harðir á móti ESB-aðild?

„Já, já það má segja það en ég held að hann sé líka valkostur fyrir þá sem eru ekki harðir á móti Evrópusambandsaðild. Nálgun Framsóknarflokksins á ESB er til að mynda öðruvísi en hjá Samfylkingunni þar sem þetta eru frekar trúarbrögð. Hjá okkur má finna breiðari hóp," sagði Sigmundur Davíð.