Fágætt eintak af smásögu eftir Hemingway boðið upp á Íslandi

Næstkomandi laugardag verður blásið til bókauppboðs á vefnum uppboð.is. Að uppboðinu standa Gallerí Fold og Bókin Klapparstíg.

Í tilkynningu frá aðstandendum segir að á uppboðinu verði sjaldgæfar og sögulega merkilegar bækur.  „Má þar nefna frumútgáfu af God rest you merry Gentlemen eftir Hemingway sem gefin var út í New York 1933. Upplagið var aðeins 300 eintök og er þetta eintak tölusett nr. 175.“

Þá verða boðnar upp bækurnar Lesrím sem prentuð var á Beitistöðum 1817, fyrsta útgáfa af Njálu prentaðri í Kaupmannahöfn 1772 og Saga Ara Fróða prentuð á Skálholti 1688 en þar er um mikið fágæti að ræða.

„Einnig verða boðnar upp listaverkabækur og gott úrval af fagurbókmenntum auk ljóðabóka og bóka um íslensk og norræn fræði,“ segir ennfremur.

Þetta er fjórða uppboðið sem er haldið í samstarfi Bókarinnar Klapparstíg og Gallerís Foldar en uppboðinu lýkur 3. desember.