Félagar glæpagengja ganga um vopnaðir

Greiningardeild telur glæpagengi smygla skotvopnum til landsins og bera þau á götum úti. Erlend gengi séu skipuð stórhættulegum mönnum sem hlotið hafi herþjálfun. Framleiðsla á mjög sterku amfetamíni hefur stóraukist hér á landi.

Lögregla býr yfir upplýsingum þess efnis að skammbyssum sé smyglað inn í landið, að því er fram kemur í nýju hættumati greiningardeildar Ríkislögreglustjóra. Fyrir liggur að þekktir hópar afbrotamanna hafa á síðustu misserum lagt áherslu á að komast yfir vopn.

Greiningardeild telur að þessa þróun megi rekja til tilkomu erlendra glæpahópa. Þá flokka fylla iðulega menn sem hlotið hafa herþjálfun erlendis og sýnt hafa af sér vilja til grófrar valdbeitingar, hömluleysi og hrottaskap.

Greiningardeildin telur ástæðu til að óttast að aukin vopnaeign og -burður muni fylgja starfsemi glæpahópa. Fyrir hendi séu vísbendingar þess efnis að í vöxt færist að félagar í erlendum sem innlendum glæpahópum gangi um vopnaðir. Komi til átaka milli glæpahópa eða einstaklinga sem þeim tengjast er ljóst að almenningi kunni að vera hætta búin. Hættu á vopnuðum átökum telur deildin fara vaxandi.

Greiningardeildin vekur enn fremur athygli á þaulskipulögðum innbrotum og þjófnuðum erlendra glæpagengja hér á landi og nefnir meðal annars ránið í úraverslun á Laugavegi í októbermánuði. Ætlunin hafi verið að flytja þýfið úr landi og vitað sé að slíkur „útflutningur“ hafi farið fram á undanliðnum árum.

„Atburðir þessir vísa í senn til aukinnar hörku í íslenskum undirheimum og umsvifa erlendra glæpahópa hér á landi,“ segir í hættumatinu, þar sem jafnframt er vakin athygli á vöruskiptum glæpahópa þar sem þýfi er skipt fyrir fíkniefni.

Greiningardeildin bendir á að peningaþvætti sé mikilvægur liður í alþjóðlegri glæpastarfsemi, svo sem fíkniefnaviðskiptum, vændi og mansali. Hruni fjármálakerfisins og miklum efnahagsvanda fylgi sú hætta að peningaþvætti færist í vöxt. Sú staða geti haft í för með sér að ágóða af sölu fíkniefna verði í auknum mæli varið til fjárfestinga.

Greiningardeild segir framleiðslu á örvandi efnum og maríjúana hafa stóraukist hér á landi á undanförnum árum. Amfetamínframleiðslan hér skili sérlega sterkum og hættulegum efnum, sem geti gert menn stjórnlausa og ofbeldisfulla, auk hættu á sprengingum við framleiðsluna. Þessi framleiðsla sé því vaxandi samfélagsógn.

jss@frettabladid.is