Fjárlagafrumvarpið ógnar stöðugleikasáttmálanum

Vilhjálmur Egilsson, framkvæmdastjóri Samtaka atvinnulífsins, óttast að fjárlagafrumvarpið ógni stöðugleikasáttmála stjórnvalda og aðila vinnumarkaðarins. Frumvarpsið sé til þess fallið að fæla fjárfesta frá því að festa fé sitt hér á landi.

Fjármálaráðherra kynnti í dag fjárlagafrumvarp ársins 2010. Þrátt fyrir niðurskurð og verulegar skattahækkanir er gert ráð fyrir því að ríkissjóður verði rekinn með 87 milljarða króna halla. Mesti þunginn mun lenda á almenningi en stefnt er að hallalausum ríkisfjármálum árið 2013.

„Stöðugleikasáttmálinn byggist á því að við séum að reyna að koma okkur út úr kreppunni. Lykilatriði er að ná fjárfestingunum í gang og ná hreyfingu á atvinnulífið. Þá þurfum við að tryggja að stórfjárfestingar í atvinnulífinu gangi upp," sagði Vilhjálmur í seinnifréttum Ríkissjónvarpsins í kvöld.

Vilhjálmur sagði ýmislegt standa í vegi fyrir að þessar fjárfestingar nái fram að ganga. „Það er ekki bara skatta áforminn því það er líka þessi ákvörðun umhverfisráðherra að loka á allar framkvæmdir á Suðurnesjum."