Fjögur hundruð prósent aukning hjá björgunarsveitum

Björgunarsveitir á landinu öllu fóru að meðaltali í fjögur útköll á dag í janúarmánuði. Þetta er um fjögurhundruð prósenta aukning frá fyrra ári.

Björgunarsveitarmenn unnu sannkallað þrekvirki þegar þeir björguðu tveimur Belgum af Vatnajökli um helgina.

„Ég held að það séu komnir fimm eða sex hópar sem við höfum sótt frá áramótum, ég held að við höfum sótt alla hopa nema einn sem hafa farið þarna, af erlendum ferðamönnum, sjálfstætt," segir Jónas Guðmundsson, verkefnisstjóri hjá Landsbjörgu.

Gríðarleg aukning hefur orðið á fjölda útkalla í vetur um landið allt.

Björgunarsveitir fóru í 99 útköll í desembermánuði. Útköllin voru 43 í desember árið 2010 og er þetta því ríflega hundrað prósenta aukning.

Fjöldinn var enn meiri í janúar. Þá fjölgaði útköllum milli ára úr 28 í janúar 2011, í 132, sem gera að jafnaði um fjögur útköll á dag.

„það er auðvitað margt sem spilar inn í, við höfum verið með ansi umhleypingasama tíð í vetur, það er búið að vera leiðindaveður oft," segir Jónas.

Markaðsátakið Ísland allt árið hófst í haust en því er meðal annars ætla að fjölga ferðamönnum sem koma í vetrarferðir til Íslands.

„Hversu stór hluti það er, það get ég náttúrulega ekki svarað til um frekar en aðrir, en klárlega erum við að merkja aukinn áhuga á vetrarferðalögum á íslandi, hvort sem það er á Vatnajökli, á hálendinu eða á vegum landsins."

Jónas telur upplýsingagjöf til ferðamanna algjört lykilatriði, og vekur í því sambandi sérstaka athygli á slysavarnarvefnum Safetravel.is. Þar geta ferðamenn skilið eftir ferðaáætlun sína sem aðstoðar björgunarsveitarmenn til muna ef til leitar kemur. Það er einmitt það sem Belgarnir gerðu áður en þeir lögðu á jökulinn.

„Ég held að þeir hafi undirbúið sig vel, þeir voru með góðan búnað, Hillebert tjöld, sem er nú talið eitt það besta í heimi . þannig að ég held að þarna hafi bara aðstæðurnar spilað inn. mikið frost og kuldi og vindur, og því fór sem fór," segir Jónas að lokum.