Fleygðu fimmhundruð plastgítörum yfir Heklu

Margt hefur á daga Þristsins, DC3 flugvélar Þristavina drifið þá áratugi sem vélin hefur verið á flugi en sennilega hefur hún aldrei farið í eins skrítið verkefni og á dögunum. Afraksturinn má nú sjá á Youtube og fleiri netsíðum en um er að ræða auglýsingu frá tölvuleikjaframleiðanda.

Í myndbandinu má sjá þegar Þristurinn er fylltur af um fimm hundruð plast-gítörum sem notaðir eru til þess að stjórna tölvuleikjum á borð við Guitar Hero og Rockband. Síðan er flogið af stað frá Reykjavíkurflugvelli og áleiðis að eldfjalli einu miklu. Þegar vélin er yfir gíg fjallsins er farmurinn látinn gossa út og ofan í kraumandi hraunið en eitthvað hefur dramatíkin verið aukin með tölvubrellum eins og sjá má hér að neðan.

Með auglýsingunni vill fyrirtækið undirstrika að leikurinn „Power Gig: Rise of the Six-String“, taki hinum leikjunum tveimur langt fram að gæðum enda er notast við alvöru gítara með alvöru strengjum í þeim leik en ekki plasteftirlíkingar.

Karl Hjartarson hjá Þristavinum segir að verkefnið hafi verið eftirminnilegt í meira lagi. Bandarísk auglýsingastofa hafi falast eftir vélinni og síðan hafi verið farið í breytingar á henni því öll merki á henni voru hulin. Síðan var flogið með mennina um landið til þess að finna hentugan tökustað og á endanum var ákveðið að taka upp við Heklu. Í fyrstu höfðu auglýsingamennirnir þó í hyggju að taka auglýsinguna upp yfir Eyjafjallajökli en af því gat ekki orðið.

Þyrla með í för

Þá þurfti einnig að taka hurðirnar af vélinni og smíða þartilgerðan pall um borð að sögn Karls auk þess sem myndavél var fest undir Þristinn. Þá var þyrla einnig með í för til þess að mynda vélina á flugi. „Eftir talsverðan undirbúning var síðan ákveðið að henda þessu út í tveimur hollum 250 gítörum í einu," segir hann. Mennirnir sem sjást í myndbandinu henda gítörunum út eru slökkviliðsmenn úr Reykjavík að sögn Karls en á jörðu niðri biðu björgunarsveitarmenn frá Hellu sem fengu það verkefni að tína gítarana upp. „Það var strax sett fram skýr krafa um það að alla gítarana yrði að endurheimta," segir Karl og bætir við að öll tilskilin leyfi hafi verið fengin fyrir uppákomunni.

Auglýsinguna má sjá hér.