Fréttastofur Vísis, Stöðvar 2 og Fréttablaðsins sameinaðar

Stjórn 365 miðla hefur ákveðið að fréttastofur fyrirtækisins, ritstjórn Fréttablaðsins og fréttastofa Stöðvar 2, Vísis og Bylgjunnar, verði sameinaðar í eina öfluga fréttastofu 365.

Jafnframt hefur verið ákveðið að fella allan sjónvarpsrekstur annan en þjónustu fréttastofu undir eina stjórn, bæði dagskrársetningu og eigin framleiðslu fyrir opna og lokaða dagskrá Stöðvar 2 og sportstöðva og fylgistöðva Stöðvar 2, sem eru Krakkar, Gull, Bíórásin og PoppTV.

Freyr Einarsson mun stýra sjónvarpsrekstri fyrirtækisins. Loks eru rekstrarmál sem snúa að húsnæði, bifreiðum ofl, færð frá fjármálasviði og undir stjórn Svans Valgeirssonar sem stýrir Þróunar- og rekstrarmálum.

Sameinaðri ritstjórn stýra núverandi ritstjórar Fréttablaðsins. Mikael Torfason verður aðalritstjóri og leiðir sameiningarferlið og Ólafur Þ. Stephensen verður ritstjóri. Áfram verða svo starfandi frétta- og vaktstjórar einstakra miðla.

Sameiningin er rökrétt framhald á aukinni samvinnu ritstjórna 365 miðla undanfarin ár. Með því að stíga skrefið til fulls er dregið úr tvíverknaði og óhagræði og kraftar rúmlega 100 starfsmanna nýttir betur.

Breytingin mun hafa í för með sér að talsverður hópur fréttamanna vinnur fréttir fyrir alla miðla fyrirtækisins jöfnum höndum.  Með því næst tvennt fram. Annars vegar verða blaðamenn sérfræðingar í efni málsins fremur en miðlinum og fjölbreytt þekking þeirra á málum nýtist betur. Hins vegar verður til öflugri sýn á það hvaða hliðum stórra fréttamála er best sinnt í hverjum miðli fyrir sig og miðlarnir vinna saman að því að búa til sterka heildarmynd fyrir lesendur, hlustendur og áhorfendur.

Um leið og hópur fréttamanna vinnur fyrir alla miðla verður til svigrúm fyrir aðra til að fara dýpra í málin í einstökum miðlum. Sameiningin þjónar þannig því meginmarkmiði að viðskiptavinir miðla 365 fái betri fréttaþjónustu.

Sameiningunni verður hrint í framkvæmd í áföngum á næstu vikum og mánuðum.