Klói er orðinn köttaður

Kötturinn Klói, sem hefur verið utan á Kókómjólkurfernum í um aldarfjórðung, er nú orðinn massaður. Uppskriftin að Kókómjólkinni er þó alltaf sú sama, þrátt fyrir að upplýsingar um næringainnihald hafi breyst.

Við breytingar á útliti fernunnar voru breytingar gerðar á upplýsingum sem gefnar eru upp í næringainnihaldi drykksins. Upplýsingarnar eru reiknaðar upp úr nýjum mælingum á mjólkurhráefni.

„Við gerum allar breytingar á Klóa af mikilli varfærni,“ segir Baldur Jónsson, verkefnastjóri hjá Mjólkursamsölunni.

Íslenska auglýsingastofan sá um breytingarnar á Klóa. „Umbúðum hefur verið breytt reglulega til að færa vöruna til nútímans en uppskriftin er alltaf sú sama,“ bætir Baldur við.

Uppskriftinni ekki breytt

Þegar nýju fernurnar voru kynntar fyrir skömmu vakti það athygli að upplýsingar um næringainnihald höfðu breyst.

Á nýju fernunum kemur t.d. fram að 68 kaloríur séu í 100 grömmum af Kókómjólk, sem er einni kaloríu meira en áður.

Uppgefið hlutfall próteins og kolvetna á nýju fernunum var einnig hærra en á þeim gömlu.

Dr. Björn S. Gunnarsson, vöruþróunarstjóri MS segir uppskriftina ekki hafa breyst. Upplýsingarnar á nýju fernunum eru í samræmi við nýjar mælingar á mjólkurhráefni og munurinn er innan skekkjumarka.

Klói á besta aldri

Kókómjólkin kom á markað árið 1973.

„1990 eða fyrir 24 árum hoppaði síðan Klói inn á pakkningarnar,“ segir Baldur Jónsson. Klói var upphaflega teiknaður af Jóni Axeli Egilssyni kvikmyndagerðarmanni.

Fyrstu ellefu árin sem Klói var á Kókómjólkurfernuninni hélst hann óbreyttur. Eftir breytingarnar varð Klói aðeins unglegri að sögn Baldurs.

„Þá var höfundarréttur keyptur af Jóni Axeli. Hvíta Húsið hafði þá unnið að endurhönnun umbúða og andlitslyftingu á Klóa sem voru svo teknar í gagnið 2001. Mikil undirbúningsvinna var unnin áður en þeim breytingum var hrint í framkvæmd,“ segir Baldur og bætir við:

„Við höfum alltaf farið varlega í breytingar á Klóa. Til dæmis voru auglýsingar með nýju útliti Klóa búnar að vera í gangi í tvö ár áður en við breyttum honum á fernunni.“

Reglulegar breytingar

Eins og Baldur segir hefur Klóa og Kókómjólkurfernunum verið breytt reglulega eftir aldarmót.

„Í aðdraganda ársins 2014 var enn á ný unnið með útlit umbúða og Íslenska auglýsingastofan hefur unnið að umbúðabreytingum.“

Baldur segir að samhliða breytingum á útliti Klóa á Kókómjólkurfernunum verði búningi sem notaður er við markaðssetninguna líklega breytt.

„Klói hefur alltaf látið sjá sig annað slagið á skemmtunum. Búningurinn sem notaður var í það var nokkuð þungur og erfitt að athafna sig í honum. Nýi búningurinn verður miklu léttari og verður meira í ætt við fimleikabúning einhverskonar. Þeim sem koma fram í búningnum finnst það líklega mjög góð breyting,“ segir hann.