Gamli Landsbankinn á fyrir Icesaveskuldinni

Áætlaðar endurheimtur þrotabús Landsbankans eru um 13 milljörðum krónum meira en sem nemur heildarfjárhæð forgangskrafna í þrotabúið, miðað við fastsett gengi íslensku krónunnar þann 22. apríl síðastliðinn. Áætlaðar endurheimtur eru 1332 milljarðar króna en forgangskröfur nema 1319 milljörðum. Forgangskröfur í bankann eru aðallega Icesave innlánin og heildsöluinnlán.

Í tilkynningu frá skilanefnd Landsbankans, vegna árshlutauppgjörs, kemur fram að raunaukning á áætluðum endurheimtum á öðrum ársfjórðungi sé einkum til komin vegna hækkunar á verðmati á eignum bankans, meðal annars kröfum á fjármálafyrirtæki, útlánum til fyrirtækja í lánasafni og hækkunar á áætluðu verðmati skilyrta skuldabréfsins sem Landsbankinn hf mun gefa út til Gamla Landsbankans.

Reiðufé skilar sér hraðar inn í bankann en fyrri áætlanir gerðu ráð fyrir og nam það 453 milljöðrum króna um mitt þetta ár. Meginskýringin er að útlán hafa innheimst hraðar en áður var gert ráð fyrir. Reiðufé er nú sem nemur um rúmlega þriðjungi af bókfærðri stöðu forgangskrafna, áætlaðar endurheimtur samkvæmt samningi við Landsbankann nema um þriðjungi af verðmæti heildareigna og útlán og aðrar eignir nema um þriðjungi.