Gjaldtaka við Geysi

Landeigendur á Geysissvæðinu hafa ákveðið að koma á gjaldtöku fyrir ferðamenn á svæðinu á næstunni. Garðar Eiríksson er talsmaður Landeigendafélagsins Geysis ehf, en hann segir gjaldtökuna nauðsynlega til að hægt sé að halda svæðinu í upprunalegu horfi.

„Við þufum að grípa inní, ekki seinna en strax,“ segir Garðar.

Ragnheiður Elín Árnadóttir, ráðherra nýsköpunar- og atvinnuvega, hefur lýst yfir vilja til hefja gjaldtöku á ferðamannastöðum með einhverjum hætti og þá helst fyrir næsta sumar. Garðar segir landeigendur ekki geta beðið eftir niðurstöðu í þessu máli þó þeir skoði vissulega aðkomu að því þegar þar að kemur. Garðar segir gjaldið ekki fara yfir þúsund krónur og vera það sama fyrir Íslendinga og ferðamenn.

„Sporin eru jafnþung hvort sem um er að ræða Íslending eða Þjóðverja,“ segir Garðar

Garðar segir landeigendur ekki hafa áhyggjur af færri heimsóknum á svæðið eftir að gjaldtakan verður að veruleika. Og aðspurður um hvort í gjaldtökunni felist ekki aukin ábyrgð á landeigendur um aðstöðu á staðnum segir Garðar það vissulega vera svo. Þeirra hugur standi til að gera svæðið að enn skemmtilegri upplifun fyrir gesti með aðstöðu sem allir geta verið stoltir af.

Þó sitt sýnist hverjum um gjaldtöku við helstu ferðamannastaði hér á landi er þessi háttur hafður á við marga af þekktustu ferðamannastaði heim líkt og sjá má í meðfylgjandi myndbandi.

Þannig greiða ferðamenn tæpar 2000 krónur fyrir að skoða hringleikahúsið Colosseum í Róm, tæpar 900 krónur fyrir að ganga á Kínamúrinn og um 2.900 krónur fyrir að skoða Stonehenge í Englandi.

Þá kostar um 1.100 krónur að heimsækja Yosemite þjóðgarðinn í Bandaríkjunum en enginn aðgangseyrir er að Niagra-fossunum. Þar kostar þó um 1000 krónur að leggja bíl.

Við Victoriu-fossa í Afríku og Taj Mahal á Indlandi er ólík gjaldskrá fyrir ferðamenn og heimamenn. Það kostar um 1000 krónur að skoða fossana en 250 krónur fyrir heimamenn. Heimamenn greiða svo um 30 krónur fyrir að skoða Taj Mahal á meðan ferðamenn greiða um 1400 krónur.