Innlent

Góður undirbúningur og nætursjónaukar björguðu mönnunum

Jón Hákon Halldórsson skrifar
Undirbúningi erlendu ferðamannanna fyrir ferðina á Vatnajökul er meðal annars þakkað það hversu vel tókst að bjarga þeim eftir að þeir kölluðu eftir hjálp í gær. Björgunarsveitamenn á fjórum vélsleðum og þyrla Landhelgisgæslunnar fóru til að aðstoða mennina þegar kallið barst.

Samkvæmt upplýsingum frá Landhelgisgælsunni fengu ferðamennirnir lánaðan neyðarsendi hjá Slysavarnarfélaginu Landsbjörg áður en þeir fóru. Þeir skiluðu inn ferðaáætlun og létu vita af sér. Þeir kveiktu svo á neyðarsendinum þegar veður fór versnandi. Sást staðsetning þeirra strax með nætursjónaukunum þegar komið var á staðinn. Voru mennirnir orðnir mjög kaldir þegar þyrlan hífði þá þá um borð.

Mennirnir sendu neyðarskeytið frá sér á tíunda tímanum með staðsetningu í Breiðubungu í austanverðum Vatnajökli. Var boðunum komið áfram til Fjarskiptamiðstöðvar lögreglunnar sem hafði samband við lögregluna á Höfn. Lögreglan boðaði út hjálparsveitir björgunarfélags Landsbjargar á Höfn og óskaði eftir þyrlu Landhelgisgæslu til leitar kl. 22:50. Sigmaður úr þyrlunni aðstoðaði mennina upp í þyrluna og flaug hún svo með mennina til Hafnar í Hornafirði þar sem lögregla tók við þeim. Hélt þyrlan síðan aftur til Reykjavíkur.

Á meðfylgjandi myndskeiði getur þú séð þegar mennirnir eru hífðir upp í þyrluna.







Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×