Hársbreidd frá undanúrslitasæti

Eygló Ósk Gústavsdóttir, sundkona úr Ægi, hafnaði í 17. sæti í undankeppninni í 200 metra baksundi á HM í 50 metra laug í Barcelona í morgun.

Eygló Ósk kom í mark á tímanum 2:12,32 mínútur og var 18/100 úr sekúndu frá kínverskum keppanda sem hafnaði í sextánda sætinu. Eygló fær þó sæti í úrslitum fari svo að einhver keppendanna sextán eigi ekki heimangengt í úrslitin.

Eygló var nokkuð frá sínu besta því Íslandsmet hennar í greininni er 2:10,38 mínútur. Hún átti sextánda besta tíma keppendanna 37 fyrir sundið í dag. Íslandsmetstíminn hefið skilað henni í níunda sæti í undankeppninni.