Hinsegin dagar með pólitísku sniði

Fjöldi fólks fylgdist með Gleðigöngu Hinsegin daga í miðbæ Reykjavíkur í dag. Sendiherrar Kanada og Bandaríkjana á Íslandi tóku þátt í göngunni að ógleymdum Jóni Gnarr borgarstjóra.

Gleðigangan fór af stað klukkan tvö í dag, en þetta var í þrettánda skipti sem hún er haldin. Alls voru 39 atriði hluti af litríkri skrúðgöngu í ár. Vagnar sem ætlaðir voru sem ádeila á umdeildar aðgerðir rússneskra stjórnvalda gegn samkynhneigðum voru áberandi, sem og vagnar til heiðurs uppljóstrurunum Bradley Manning og Edward Snowden. Hátíðin var því með fremur pólitísku sniði þetta árið.

Eva María Þórarinsdóttir, formaður Hinsegin daga 2013, segir mikilvægt að minna á bág kjör hinsegin fólks í öðrum löndum. Þá segir hún að það sé mikilvægt að fólk hafi í huga að mannréttindi séu ekki einkamál þjóða.

Sendiherrar Bandaríkjana og Kanada á Íslandi skelltu sér í litríkan skrúða og tóku þátt í Gleðigöngunni. Luis Arreaga, sendiherra Bandaríkjana, tók þátt í göngunni í þriðja skipti í ár. Hann segir að það sé mikilvægt að halda áfram að berjast fyrir réttindum samkynhneigðra og þó að mikill árangur hafi nú náðst sé enn langt í land.

Stewart Weeler, sendiherra Kanada á Íslandi, er sjálfur samkynhneigður og gekk gönguna í dag með manni sínum. Hann segir Ísland og Kanada mjög samstíga hvað varðar baráttumála samkynhneigðra.

Fjölmargir þjóðþekktir einstaklingar gengu með í Gleðigöngunni í dag, þar á meðal Ómar Ragnarsson, en hann hefur tekið þátt síðan leyft var að bílar keyrðu með göngunni.  Þá lét Jón Gnarr sig ekki vanta frekar en fyrri daginn