Hótel Plaza rýmt vegna elds - Strætó og Rauði krossinn mætti til aðstoðar

„Þetta gekk mjög vel og fólk var mjög rólegt og yfirvegað,“ segir Oddur Hallgrímsson, varðstjóri hjá slökkviliðinu á höfuðborgarsvæðinu.

Eldur kom upp í þakrými á Hótel Plaza í miðbæ Reykjavíkur um klukkan sex í morgun. Vel gekk að slökkva eldinn, sem var töluvert mikill. „Við fáum tilkynningu um klukkan tíu mínútur í sex um að það sé reykur frá hótelinu. Allar stöðvar sendar á staðinn og þegar fyrsti bíll kemur á vettvang er greinilegt að reykur kemur frá hótelinu,“ segir Oddur í samtali við fréttastofu. „Það var eldur í tæknirými í einni af viðbyggingunni og fór reykur inn í nokkur herbergi,“ segir hann.

„Svo virðist að bilun hafi orðið í rafmótor sem keyrir loftræstikerfið áfram og kviknaði hafi í honum,“ segir hann en eldurinn hafi svo náð að festa sig í timbri. „Þetta var töluvert mikill eldur en við náðum tökum á honum.“

Fullt af gestum voru á hótelinu þegar eldurinn kom upp í morgun og gekk vel að rýma hótelið. „Strætó kom með strætisvagna til að fólkið gæti hvílt sig en það þurfti nú varla því veðrið var frábært. Síðan kom Rauði krosinn og aðstoðaði fólk, en það voru allir mjög yfirvegaðir og tóku þessu á rólegum nótum.“

Þegar búið var að slökkva eldinn og verið var að reykræsta efstu hæðar hótelsins var fundað með gestum hótelsins en þeir eru flestir útlendingar. „Þeim var sagt hvað væri um að vera og hverjir kæmust upp á herbergin sín strax og hverjir ekki. Síðan var fljótlega farið að þjónusta alla þá sem voru að fara í flug,“ segir Oddur.