Hringinn í kringum Ísland á hjólabrettum

Ítölsku ævintýramennirnir Ottavio Calabrese og Matteo Cappa ætla að fara hringinn í kringum Ísland á hjólabrettum. Blaðamaður náði tali af Calabrese á Suðurlandi, skammt frá Seljalandsfossi, þar sem hann var á fleygiferð á brettinu sínu.

„Mér var sagt frá þessum vegi sem liggur í kringum eyjuna. Mig hafði alltaf langað til að skoða þetta land þannig að ég hugsaði með mér, hvers vegna ekki?,“ sagði Calabrese glaðbeittur.

Hann reiknaði út á Google Earth að hann yrði í 26 daga að ferðast í kringum Ísland en þegar hingað var komið áttaði hann sig á því að það gæti tekið lengri tíma. „Kannski eru 26 dagar ekki nóg en við höfum einn mánuð til að fara hringinn. Eftir það eru peningarnir frá styrktaraðilunum búnir.“

Hinn 28 ára Calabrese fór fyrst í langferð á hjólabretti í gegnum Frakkland fyrir tveimur árum. Ísland er fyrsta landið utan meginlands Evrópu sem hann heimsækir. „Hver veit hvað framtíðin ber í skauti sér? Kannski fer ég til Marokkó eða Suður-Ameríku,“ sagði hann um framhaldið.

Eins og gefur að skilja er uppátæki Calabrese og Cappa nokkuð hættulegt enda er umferðin oft mikil á þjóðveginum, sérstaklega að sumri til. „Jú, þetta er dálítið hættulegt því þjóðvegurinn hér er þröngur. Í Frakklandi er neyðarakrein þar sem ég gat verið en ef það er mikil umferð tek ég brettið bara upp og held á því,“ sagði hann og rauk af stað á brettinu, enda í miklu kapphlaupi við tímann.