Hvalirnir reknir frá landi

Bátum sem voru við Akranes hefur tekist að reka grindhvalina frá landi, segir Stefán Þórðarson á Akranesi. Um 200 grindhvalir voru komnir nærri landi við Leyni á Akranesi í morgun eins og greint hefur verið frá. Stefán og Hermann Hermannsson vinur hans brugðust snarlega við þegar þrír af hvölunum voru nánast alveg komnir í strand og orðnir fastir. Þeir sóttu vöðlur og óðu ofan í sjóinn til að bjarga hvölunum.

„Þetta gekk bara mjög vel," sagði Stefán þegar Vísir talaði við hann í dag. „Þetta var ekkert stórmál. Þetta var meira svona ævintýramennska að fara í þetta, en það var að falla frá og þetta varð því að gerast mjög fljótt," bætti hann við.

Hann segir að þetta hafi tekið í mesta lagi fimmtán mínútur að losa hvalina. Einn hvalurinn hafi þó setið pikkfastur og verið orðinn svolítið blóðugur. Stefán telur þó ekki að hann hafi verið alvarlega særður.