Hvetur nemendur til þess að kæra hausaveiðar norska hersins

„Það er náttúrulega alveg rakið að einhverjir ungir, róttækir og röskir nemendur taki sig til og leggi fram kæru," segir Stefán Pálsson, formaður Samtaka hernaðarandstæðinga, um útsendara norska hersins sem hefur komið hingað til lands og kynnt starfsemi hersins í þremur menntaskólum. Þar af gamla skólanum hans Stefáns, Menntaskólanum í Reykjavík. Auk MR hafa kynningarnar, eða nýliðunin, farið fram í Verslunarskólanum og Menntaskólanum Hraðbraut.

Að ráða menn innan íslenska ríkisins til erlendrar herþjónustu er ólöglegt samkvæmt íslenskum hegningarlögum. Orðrétt segir í 114 grein almennu hegningarlaganna: Hver, sem ræður menn innan íslenska ríkisins til erlendrar herþjónustu, skal sæta …1) fangelsi allt að 2 árum.

„Ég væri ánægður með mína menn ef þau væru einhverjir sem myndu kæra kauða til lögreglunnar," segir Stefán sem minnir að lögfræði sér orðin valgrein innan MR.

„Þetta væri þá tilvalið prófverkefni," segir Stefán.

Þá setur Stefán einnig spurningamerki við störf námsráðgjafa hjá skólanum en hermaðurinn Hilmar Haraldsson, sem nú er liðsforingi í norska hernum, segist ekki hafa orðið var við andstöðu í skólunum um að námið yrði kynnt.

Stefán segir Norðmenn hafa kynnt starfsemi sína áður. Þannig gerðu Samtök hernaðarandstæðinga athugasemdir við umfjöllun um nám sem bauðst innan norska hersins, og birtist í Morgunblaðinu fyrir um tveimur árum síðan. Þá fannst samtökunum það mjög undarlegt að kynningin hefði birst í blaði sem fjallaði almennt um menntunarmöguleika fyrir ungmenni.

„Það er hinsvegar eðlismunur þegar menn eru farnir að leggjast í skipulega nýliðun í menntaskólum hér á landi," segir Stefán.

Spurður hvort búast megi við því að Samtök hernaðarandstæðinga kæri málið í ljósi hegningarlaganna svarar Stefán: „Ef það væru töggur í nemendum þá gerðu þeir það bara sjálfir. Ég veit að ég hefði gert það."

Á vefsíðu norska sendiráðsins í Reykjavík segir að íslenskir ríkisborgarar hafi samkvæmt samningi frá 1995 rétt til að sækja um skólavist við herskóla norska hersins. Að gefnum fyrirvara um skólavist í herskóla skal umsækjandi gegna herþjónustu í norska hernum samkvæmt þeim skilmálum sem fram koma í samningi um menntun og herþjónustu.

Undanfarin tíu ár hafa átján íslenskir ríkisborgarar gegnt herþjónustu í Noregi, að því er segir í frétt norska ríkisútvarpsins. Sex þeirra eru sagðir hafa tekið þátt í aðgerðum norska hersins í Afganistan.

Í fréttum RÚV í gærkvöldi kom fram að tveir íslendingar bíði nú eftir að þreyta inntökupróf í skólann.