Játar að hafa dregið sér fé í Mósambík

Jóhann Ragnar Pálsson, fyrrverandi umdæmisstjóri Þróunarsamvinnustofnunar Íslands (ÞSS) í Mósambík hefur játað fjárdrátt í starfi en ákæruliðirnir eru 29 talsins.

Mál hans var þingfest í mars síðastliðnum en þar játaði hann afbrotin. Hann hefur verið ákærður fyrir að draga sér tæplega fimmtán milljónir króna sem starfsmaður ÞSS á fjögurra ára tímabili.

Féð notaði hann meðal annars til þess að kaupa utanborðsmótor, tölvu til eigin nota auk þess sem hann notaði féð til þess að greiða fyrir viðgerð á eigin bíl.

Samkvæmt ákæruskjalinu reyndi Jóhann að fela slóð sína meðal annars með því að útbúa falskar skýringar á hvarfi fjárins. Upp komst að lokum um Jóhann í janúar árið 2010.

Málflutningur fer fram í máli Jóhanns næsta mánudag.