Jóhanna hvetur fólk til að styðja tillögur stjórnlagaráðs

Þótt niðurstaða í þjóðaratkvæðagreiðslunni um tillögur stjórnlagaráðs verði neikvæð, breytir það ekki því að þörfin fyrir heildarendurskoðun stjórnarsrkárinnar verður söm og áður. Þetta sagði Jóhanna Sigurðardóttir forsætisráðherra á Alþingi í dag.

Sérstök umræða um þjóðaratkvæðagreiðsluna hófst á Alþingi klukkan tvö í dag, en málshefjandi var Bjarni Benediktsson, formaður Sjálfstæðisflokksins. Bæði Bjarni Benediktsson og Ólöf Nordal, varaformaður Sjálfstæðisflokksins, hafa eindregið hvatt kjósendur til þess að segja nei í atkvæðagreiðslunni.

Jóhanna sagði í dag að ljóst væri að verði niðurstaðan neikvæð verði ekki unnt að leggja tillögur stjórnlagaráðs til grundvallar frumvarpi að nýrri stjórnarskrá fyrir næstu alþingiskosningar. „Frá mínum sjónarhóli væri það sorglegur endir á því merka lýðræðisferli sem málið hefur fengið að þróast og þroskast í, ferli sem víða hefur vakið verðskuldaða athygli og gæti orðið örðum þjóðum til eftirbreytni," sagði Jóhanna.

Hún sagði þó að valdið og valið væri kjósenda. „Við neikvæða niðurstöðu ber að una jafnt sem jákvæða. Það ættu að vera megin skilaboð Alþingis til þjóðarinnar í þessari umræðu," sagði Jóhanna. „Neikvæð niðurstaða mun hins vegar ekki breyta því að þörfin fyrir heildarendurskoðun stjórnarskrárinnar verður söm og áður og ég óttast mjög að mörg ár ef ekki áratugir muni líða áður en niðurstaða fæst um slíka endurskoðun, ef þetta tækifæri fer forgörðum," bætti hún við.