Innlent

Karlar í lögreglunni vantreysta konunum

Stígur Helgason skrifar
Konur eru rúmlega tíu prósent lögreglumanna á landinu. Myndin er úr safni.
Konur eru rúmlega tíu prósent lögreglumanna á landinu. Myndin er úr safni.
Algengt er að karlar sem sinna starfi lögreglumanna treysti ekki kvenkyns samstarfsmönnum sínum til jafns á við kynbræður sína og séu ekki tilbúnir að viðurkenna þær sem jafningja sína í starfi.

Þetta er á meðal niðurstaðna rannsóknar sem Ríkislögreglustjóri lét vinna í samstarfi við kynjafræðideild Háskóla Íslands og ber yfirskriftina „Vinnumenning og kynjatengsl lögreglunnar: Af hverju eru konur svo fámennar meðal lögreglumanna.“

„Íhaldssömustu viðhorfin koma frá yngsta aldurshópnum, 20 til 29 ára. Þeirra viðhorf er mun íhaldssamara en þeirra sem eldri eru, sem er reyndar í takt við aðrar rannsóknir um jafnréttismál,“ segir Finnborg Salome Steinþórsdóttir, sem vann rannsóknina undir leiðsögn Gyðu Margrétar Pétursdóttur lektors.

Finnborg Salome Steinþórsdóttir
Skýrsla með niðurstöðum rannsóknarinnar, sem styrkt var af Nýsköpunarsjóði námsmanna, verður gerð opinber í dag. Hún er um 150 blaðsíður að lengd. Rannsóknin, sem tók þrjá mánuði, fól í sér að staða kvenna innan lögreglunnar var kortlögð með gögnum frá lögregluembættum, spurningalisti var lagður fyrir alla lögreglumenn í maí og viðtöl tekin við fyrrverandi lögreglukonur.

Innan við 13 prósent lögreglumanna í dag eru konur, og þær hafa verið á bilinu 11 til 13 prósent síðan árið 2006. Á sama tíma hafa konur hins vegar verið á bilinu 17 til 33 prósent brautskráðra nemenda frá Lögregluskólanum, sem þýðir að brotthvarf kvenna úr lögreglunni er mikið. „Árið 2010, til dæmis, óskaði ein af hverjum tíu lögreglukonum eftir lausn frá embætti,“ segir Finnborg, sem heldur fyrirlestur upp úr rannsóknarniðurstöðunum í Lögbergi í hádeginu í dag ásamt Gyðu Margréti.




Fleiri fréttir

Sjá meira


×