Landslénið veltir 207 milljónum á ári
Ekki er hægt að komast framhjá ISNIC ef ætlunin er að skrá lén með .is-endingu. Félagið rekur nafnaþjónustu og skráningakerfi fyrir lén með slíka endingu.
Fréttablaðið/GVA
Þetta kemur fram í ársreikningi ISNIC sem skilað var inn til ársreikningaskrár 23. janúar síðastliðinn. Ársreikningurinn er sá fyrsti sem skilað er inn fyrir árið 2011 og er þetta þriðja árið í röð sem ISNIC er fyrst til að skila.
Stjórn ISNIC leggur til að félagið greiði út 30 milljónir króna í arð til eigenda félagsins á árinu 2012 vegna frammistöðu þess á árinu á undan. ISNIC hefur ekki greitt út arð frá 2006 þegar félagið var að mestu í eigu Teymis. Helstu eigendur ISNIC í dag eru Jens Pétur Jensen, framkvæmdastjóri félagsins (29,5%), Íslandspóstur hf. (18,7%), Magnús Soffaníasson (16,8%) og Bárður Tryggvason (16,2%).
Innanríkisráðuneytið hefur um nokkurt skeið verið að vinna að frumvarpi um „landslénið .is og önnur íslensk höfuðlén“. Frumvarpið var fyrst lagt fram á vorþingi 2011 og í kjölfarið tekið fyrir í samgöngunefnd án þess að vera afgreitt úr henni. Þann 14. nóvember síðastliðinn var því síðan útbýtt aftur á Alþingi án þess að vera tekið til umræðu.
Í frumvarpinu felst meðal annars að rekstur og skráning íslenskra léna, sem ISNIC hefur séð um frá upphafi hérlendis, verði leyfisskyld til fimm ára í senn. Þar segir að starfsleyfi „fyrir íslensk höfuðlén skal veitt einum aðila til fimm ára í senn, að undangengnu opnu og gagnsæju ferli“. Póst- og fjarskiptastofnun (PFS) á að úthluta leyfinu. Þeir sem fengu slíku leyfi úthlutað þyrftu einnig að greiða 4,9% af ársveltu sinni í sérstakt rekstrargjald til PFS. Miðað við tekjur ISNIC vegna landslénsins á árinu 2011 myndi slíkur skattur nema um 10 milljónum króna á ári.
Í skýrslu stjórnar ISNIC, sem fylgir ársreikningnum, er fjallað um umrætt frumvarp og í ábendingu endurskoðanda félagsins segir að „ákvæði frumvarpsins fela í sér umtalsverðar breytingar á rekstrarumhverfi Internets á Íslandi hf. Sökum þeirrar óvissu er varðar líkur á lagasetningu, gildistöku laganna og óljósar skuldbindingar, ríkir óvissa um áframhaldandi rekstrarhæfi félagsins“.
Jens Pétur segir að það þekkist hvergi að sérstakur skattur sé lagður á lén. Hann segist ekki trúa því að frumvarpið verði að lögum í því formi sem það hefur verið lagt fram. thordur@frettabladid.is
- Fréttir
- Sport
- Viðskipti
- Lífið
Fréttir eftir mánuði
Hér má finna fréttir eftir mánuði.
- Sími 512 5000
- Hafðu samband
- Starfsfólk
- Umferð
- Veftré
- Auglýsingar
- 365 Skaftahlíð 24 105 Reykjavík Sími: 512 5000