Lögreglumenn munu ekki taka niðurstöðunni þegjandi

„Undanfarnar vikur hefur samtakamáttur lögreglumanna aldrei verið sterkari og ljóst er að þeir muni ekki taka óréttlátri niðurstöðu gerðadóms þegjandi,“ segir í tilkynningu frá frá Lögreglufélagi Suðurnesja þar sem farið var yfir niðurstöður gerðadóms vegna kjaradeilu lögreglumanna við ríkið.

Djúp óánægja er í röðum lögreglumanna vegna niðurstöðunnar, í raun líta lögreglumenn svo á að fulltrúi ríkisvaldsins hafi sent þeim kaldar kveðjur þegar hann lét bóka að hann greiddi atkvæði með afstöðu formanns gerðadóms þegar hefðin er sú að hann sitji hjá samkvæmt tilkynningu lögreglumanna á Suðurnesjum.

Lögreglumenn segjast standa á krossgötum, „þar sem þeim virðast vera allar bjargir bannaðar til að sækja sér löngu verðskuldaða kjaraleiðréttingu,“ eins og það er orðað í tilkynningu.