Mál Müller til ákæruvaldsins

Lögreglan á höfuðborgarsvæðinu er búin að rannsaka kynferðisbrot, sem beinist að Margréti Müller heitinni, þegar hún var kennari við Landakotsskóla. Málið hefur verið sent ákærusviði að sögn Björgvins Björgvinssonar, yfirmanns kynferðisbrotadeildar lögreglunnar.

Lögreglunni barst kæra um áramótin og lauk rannsókn fyrir skömmu. Nú er það ákæruvaldsins að ákveða framhaldið.

Margrét svipti sig lífi árið 2008 þegar hún kastaði sér úr turni Landakotsskóla, þar sem hún bjó. Samkvæmt Björgvini beinist rannsóknin einnig að Landakotsskóla og Kaþólsku kirkjunni. Því er ekki sjálfgefið að málið verði látið niður falla þrátt fyrir að Margrét sé látin.

Það var Fréttatíminn sem greindi frá því fyrir helgi að Margrét hefði beitt tvo menn andlegu og kynferðislegu ofbeldi þegar þeir voru nemendur við skólann. Frásögn mannanna er sláandi. Annar þeirra lýsir hryllilegu kynferðislegu ofbeldi sem hann varð fyrir að hálfu Margrétar og hollenska prestsins, séra Georgs.

Þess má geta að landi Georgs, Johannes Gijsen, sem var kaþólskur biskup á Íslandi frá 1996, var borinn þungum sökum um kynferðislega misnotkun í hollenskum miðlum í september á síðasta ári. Hann fór af landi brott ári áður en Margrét svipti sig lífi, eða 2007.

Kynferðisofbeldið sem hann var sakaður um á að hafa átt sér stað þegar hann var kennari í kaþólskum skóla í Hollandi á sjötta og sjöunda áratug síðustu aldar.

Nafn hans hefur hinsvegar ekki verið nefnt í tengslum við kynferðisofbeldið sem greint var frá í Fréttatímanum.