Neytendastofa setur sölubann á Latabæjarhjálma

Neytendastofa hefur lagt bann á sölu hlífðarhjálma sem seldir eru undir vöruheiti Latabæjar. Hjálmarnir eru af gerðinni ATLAS og eru þeir framleiddir í bláum lit með mynd af íþróttaálfinum og bleikum lit með mynd af Sollu stirðu. Innflytjandi hjálmanna er Safalinn ehf.

Í tilkynningu segir að ákvörðun Neytendastofu feli í sér að Safalanum ehf. beri að fjarlægja öll óseld eintök hjálmanna af markaði þegar í stað. Hjálmarnir hafa að sögn Neytendastofu meðal annars verið til sölu í verslun Hagkaups í Smáralind.

Ástæða þess að hjálmarnir eru teknir úr umferð er að umbúðir þeirra hafa verið ranglega merktar og ekki í samræmi við lög, reglur og staðla sem um framleiðslu þeirra gilda. „Merkingar gefa til kynna að þá megi nota á skíðum en svo er ekki og skulu þeir eingöngu notaðir á reiðhjólum, hjólaskautum og hjólabrettum."

Þá segir að á umbúðum sé röng staðhæfing um að hjálmarnir séu vottaðir af Forvarnarhúsi Sjóvá, Umferðastofu og Slysavarnarfélaginu.

Ennfremur eru stærðarmerkingar á umbúðum ekki í samræmi við merkingar á hjálmunum sjálfum en þeir eru ætlaðir fyrir börn með höfuðstærð 54 -58 cm en ekki 49 - 57 cm líkt og fram kemur á umbúðum. „Einnig vantar upplýsingar um númer staðals á umbúðir og að hjálminn megi ekki nota við ákveðnar aðstæður, s.s. klifur," segir einnig og þess getið að engar tilkynningar hafi borist Neytendastofu um slys af völdum hjálmanna.