Ólöglegt niðurhal á Morgunblaði og DV

Síðustu vikuna hefur verið hægt að hlaða niður pdf-útgáfum af Morgunblaðinu og DV á skráarskiptasíðunni deildu.net.

Pappírs- og netútgáfa blaðanna er seld í áskrift en á deildu.net getur hver sem er nálgast og deilt útgáfum blaðanna án þess að rétthafar fái greitt fyrir. Allt að tvö hundruð manns hafa síðastliðna viku hlaðið niður hverju tölublaði.

Jón Trausti Reynisson, útgáfustjóri DV, segir áskriftargjöldin vera meirihluta tekna blaðsins. „Við verðum auðvitað að geta borgað blaðamönnum laun og áskrifendur hjálpa okkur við það. Besta leiðin væri að koma blaðinu í þannig form að ekki væri hægt að deila því svona en við ætlum ekki að grípa til þannig aðgerða,“ segir Jón Trausti.

Óskar Magnússon, útgefandi Morgunblaðsins, þekkti ekki til málsins þegar blaðamaður hafði samband við hann en sagðist ætla að skoða strax hvernig hægt væri að bregðast við. 

„Þetta er freklegt brot á höfundavörðu efni sem hér er búið til og það er óheimilt að deila því með þessum hætti. Við höfum ekki orðið fyrir þessu áður en nú munum við skoða til hvaða ráða er hægt að grípa,“ segir Óskar. 

Friðrik Smári Björgvinsson, yfirmaður rannsóknarlögreglu höfuðborgarsvæðisins, segir kærur hafa borist vegna deildu.net og að málið sé í rannsókn en hann geti ekki veitt frekari upplýsingar um framgang þess. 

Þær kærur tengjast myndefni sem hægt er að hlaða niður á deildu.net. Til að mynda lögðu Samtök myndrétthafa á Íslandi, SMÁÍS, fram kæru í febrúar í fyrra vegna slíks máls.