Perlur íslenskrar dægurtónlistar í eigu Straums

Margar af vinsælustu perlunum í íslenskri dægurtónlist í Hugverkasjóði Íslands eru nú í eigu gamla Straums fjárfestingarbanka. Fyrir hrunið gáfu margir vinsælir tónlistarmenn út skuldabréf gegn því að afborganir af skuldabréfunum yrðu greiddar með STEF-gjöldunum þeirra.

Ellefu tónlistarmenn seldu hugverk sín inn í Hugverkasjóð Íslands sem var í eigu Baugs og fleiri aðila árið 2006.

Þetta voru Bubbi Morthens, Gunnar Þórðarson, Stefán Hilmarsson, Guðmundur Jónsson, Jón Ólafsson, Valgeir Guðjónsson, Ragnhildur Gísladóttir, Egill Ólafsson, Eyþór Gunnarsson, Jakob Frímann Magnússon og Helgi Björnsson

Í raun er Hugverkasjóður Íslands mjög fínt heiti og frekar einföldu fyrirbæri.

Tónlistarmennirnir gáfu út skuldabréf til sjóðsins gegn staðgreiðslu í peningum. Margir þeirra fengu háar fjárhæðir greiddar út í hönd. Skuldabréfin voru útbúin þannig að STEF-gjöld af lögum höfundanna fóru beint í að greiða afborganir af þeim.

Hagnaður sjóðsins er því í raun í formi vaxtanna af skuldabréfunum.

Hugverkasjóðurinn endaði inn í félaginu Stoðum Invest ehf. eftir hrun, en félagið var eitt af dótturfélögum Baugs og höfundarrétturinn að lögunum var eina eign þess.

Straumur Fjárfestingarbanki eignaðist síðan bréfin vegna kröfu á hendur Stoðum Invest.

Félag sem stofnað var utan um gamla Straum Fjárfestingarbanka, ALMC, er nú eigandi laganna og fær STEF-greiðslur af mörgum af fallegustu og vinsælustu perlum íslenskrar dægurtónlistar. STEF-greiðslurnar fara í afborganir af skuldabréfum sem tónlistarmennir gáfu út og Hugverkasjóðurinn keypti.

Nýi Straumur, dótturfélag ALMC, sér um að reka hugverkasjóðinn.

Bubbi Morthens er sá eini sem er búinn að kaupa höfundarréttinn að tónverkum sínum til baka, samkvæmt upplýsingum fréttastofunnar, en ekki liggur fyrir hvernig kaupin voru fjármögnuð.

Hinir tíu eru enn í sjóðnum en sumir þeirra eru langt komnir með að gera upp skuldabréfin, en að svo búnu eignast þeir höfundarréttinn að lögunum sínum að nýju og þar með réttinn til STEF-gjaldanna af þeim. thorbjorn@stod2.is