Innlent

Samstarf á sviði norðurslóðarannsókna

Mynd/AP
Bandaríkin og Ísland munu hefja vinnu að viljayfirlýsingu um samstarf á sviði norðurslóðarannsókna í kjölfar fundar Össurar Skarphéðinssonar utanríkisráðherra fyrr í dag með Hillary Clinton, utanríkisráðherra Bandaríkjanna í Washington. Utanríkisráðherra Bandaríkjanna lýsti jafnframt stuðningi við að ráðist verði í gerð samnings til varnar olíuslysum á norðurslóðum, en það er einn meginkjarni norðurslóðastefnu Íslendinga.

Össur Skarphéðinsson utanríkisráðherra lýsti eindregnum vilja Íslendinga til að laða aðrar þjóðir, ekki síst Bandaríkin, til samstarf um að byggja upp á Íslandi alþjóðlega miðstöð á sviði leitar og björgunar í norðurhöfum og undirstrikaði nauðsyn þess í ljósi upplýsinga sem fram hafa komið um að siglingar hefjist fyrr en menn töldu í kjölfar upplýsinga um hraðari bráðnun heimskautaþekjunnar. Þetta kemur fram í fréttatilkynningu frá utanríkisráðuneytinu.

Össur og Clinton voru sammála um að Norðurskautsráðið ætti að vera aðalvettvangur samstarfs á norðurslóðum og lýsti Össur ánægju Íslendinga með yfirlýsingu Hilary Clinton í Kanada í fyrra um að Norðurskautsráðið, fremur en svokallað fimm-ríkja samstarf, sem Ísland er ekki aðili að, ætti að verða ráðandi vettvangur um samstarf á norðurslóðum.

Líbía og samstarf um jarðhita

Clinton og Össur ræddu samstarf Íslands og Bandaríkjanna í varnar- og öryggismálum, og fór utanríkisráðherra fram á að samstarf um hryðjuverkavarnir yrði eflt eins og kveður á í yfirlýsingu ríkjanna frá árinu 2006. Eftir fundinn með Hillary Clinton sótti utanríkisráðherra fund með sérfræðingum Bandaríkjanna um hryðjuverkahættuna í heiminum.

Þá ræddu ráðherrarnir ástandið í Arabaheiminum, þróunina í Líbíu og Sýrlandi og málefni Palestínu í kjölfar samkomulags Fatah og Hamas hreyfinganna um sameiginlega stjórn. Voru ráðherrarnir sammála um mikilvægi þess að friðarferlið í Mið-Austurlöndum fari af stað hið fyrsta og að deiluaðilar sýni ítrasta vilja til samninga. Clinton gerði utanríkisráðherra einnig grein fyrir stöðu mála í Pakistan og Afganistan.

 

Íslenskar og bandarískar stofnanir og fyrirtæki hafa átt í samstarfi um nýtingu jarðhita, um nokkurra ára skeið. Clinton og Össur lýstu áhuga á að auka það samstarf.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×