Sautján burðardýr gripin í Leifsstöð

Tollverðir stöðvuðu sautján meint burðardýr fíkniefna í Flugstöð Leifs Eiríkssonar á síðasta ári. Um var að ræða fimm Íslendinga og tólf einstaklinga, sem voru af erlendu bergi brotnir.  Að sögn Kára Gunnlaugssonar yfirtollvarðar var um að ræða 15 karlmenn og 2 konur, þannig að karlmenn eru í yfirgnæfandi meirihluta þeirra sem reyna að lauma fíkniefnum til landsins.

Umræddir einstaklingar reyndust, samkvæmt bráðabirgðatölum Tollstjóra, vera með samtals tæplega ellefu kíló af amfetamíni, tæp tvö kíló af kókaíni og 14.186 e-töflur í fórum sínum, auk amfetamínbasa í flösku sem eitt burðardýranna braut í flugstöðinni. Þessu til viðbótar var haldlagt minni háttar magn kannabisefna. Ýmist hafði fólkið komið efnunum fyrir innvortis, falið þau innan klæða eða í farangri sínum. „Það eru þessar þrjár leiðir sem helst eru reyndar í Leifsstöð,“ segir Kári og man ekki eftir neinum sem var sérstaklega frumlegur, það eru nokkur göt á mannslíkamanum og þau eru nýtt.

„Eftirminnilegast er málið sem kom í fréttum, þegar maðurinn kastaði flöskunni með amfetamínbasa í gólfið. Svona flaska með amfetamínbasa getur verið á við 10 til 15 kíló af amfetamíni. Eftirminnilegast af þessum atvikum. Og gefur til kynna hversu harður þessi heimur er orðinn.“

Eins og áður sagði er um meira magn að ræða nú en undanfarin ár. Til samanburðar má geta þess að árið 2012 stöðvuðu tollverðir sextán burðardýr fíkniefna í flugstöðinni. Þau voru með samtals rúmlega 9,5 kíló af amfetamíni, rúm 4,8 kíló af kókaíni, 1.530 e-töflur og 415 grömm af e-töfludufti. Um var að ræða tíu Íslendinga og sex útlendinga. Kári vill meina að þetta sé til marks um að menn séu að vinna vinnuna sína og standa sig vel. Erfiðara er um að segja hvort draga megi þá ályktun að meira magn eiturlyfja sé í umferð nú en verið hefur.