Skortur á sólarljósi eykur hættuna á heilablóðfalli

Ný bandarísk rannsókn sýnir að samband er á milli skorts á sólarljósi og hættunnar á því að fá heilablóðfall.

Það eru vísindamenn við háskólann í Alabama sem unnið hafa þessa rannsókn en þeir notuðu m.a. gervihnetti NASA, geimferðastofnunnar Bandaríkjanna, til að kortleggja hvernig sólarljós og hitastig hafa áhrif á hættuna af því að fá heilablóðfall.

Niðurstaðan er að fólk sem fær of lítið sólarljós er í 60% meiri hættu á að fá heilablóðfall en þeir sem fá nægilegt sólarljós. Hugsanleg skýring á þessu er að sólarljós örvar framleiðslu á D-vítamíni og þar með hinu lífsnauðsynlega clacium sem kemur í veg fyrir heilablóðföll.

Rannsóknin náði til um 30.000 manns sem voru 45 ára eða eldri en hættan á heilablóðfalli eykst með hækkandi aldri.

Heilablóðfall er þriðja algengasta dánarorsökin á Íslandi. Það veldur dauða hjá um 8% karla og kvenna. Rannsóknir á Íslandi hafa leitt í ljós, að um 600 einstaklingar fá heilablóðfall árlega. Meðalaldur þeirra er tæplega 70 ár og er þorri sjúklinga eldri en 65 ára. Heldur fleiri karlar en konur fá heilablóðfall hérlendis.