Slæmt orðalag í tilkynningu uppspretta misskilnings

Jón Atli Hermannsson, varaformaður Stúdentaráðs Háskóla Íslands, segir í samtali við Vísi að ráðið harmi fréttaflutning þess efnis að um fjárdrátt fyrrverandi starfsmanna ráðsins hafi verið að ræða.

Eins og Vísir fjallaði um í morgun hefur Stúdentaráð tekið í gagnið nýjar verklagsreglur. Ástæðan er meðal annars sú að mistök urðu hjá tveimur fyrrverandi starfsmönnum ráðsins sem töldu úttektarkort frá N1 vera afsláttarkort. Þegar í ljós kom að um úttektarkort var að ræða var ákveðið að notkun þeirra yrði dregin af launum viðkomandi starfsmanna. Það misfórst en starfsmennirnir fyrrverandi hafa nú að fullu greitt skuld sína, rúmlega hálfa milljón króna.

Athygli vekur að í tilkynningu Stúdentaráðs, sem fjölmiðlar hafa vitnað í, kemur fram að fyrrverandi framkvæmdastjóri og hagsmunafulltrúi ráðsins hafi „vísvitandi í eigin þágu" farið fram yfir umsamda upphæð á útgáfukortum sem þeir höfðu undir höndum sem starfsmenn ráðsins.

Orðrétt segir:

„Vegna mistaka við útgáfu kortanna var starfsmönnunum unnt að fara framyfir umsamda upphæð sem þáverandi framkvæmdastjóri og hagsmunafulltrúi ráðsins gerðu vísvitandi í eigin þágu en fjárhæðin sem á kortin safnaðist var í heildina rúmlega hálf milljón króna."

Jón Atli segir að um slæmt orðalag í tilkynningunni sé að ræða. Tilkynningin hafi fyrir vikið misskilist. Stjórn Stúdentaráðs hafi vitað af umræddu máli, engin tilraun hafi verið gerð til að fela neitt og skuldin sé nú greidd að fullu.

Þá minnir Jón Atli á að tilkynning Stúdentaráðs hafi verið sett inn á Student.is seint í gærkvöldi og fréttaflutningur farið fram í nótt og í morgun. Stjórn Stúdentaráðs hafi ekki enn verið kölluð saman enda líti hún svo á að málinu sé lokið. Mikið sé um að vera hjá stjórnarmeðlimum en kosningar til Stúdentaráðs fara fram í dag og á morgun.

Jón Atli gerir þó ráð fyrir því að orðalag í tilkynningu Stúdentaráðs, sem fjölmiðlar hafa vitnað í, verði breytt.