Smíða fleiri borpalla sem ráða við Drekann

Olíufélög leggja nú aukna áherslu á smíði borpalla fyrir heimskautasvæði og mikið hafsdýpi. Fyrirsjáanlegur skortur á slíkum borpöllum gæti þó valdið því að enginn verði á lausu fyrir Drekasvæðið á næstu árum.

Þetta er borpallurinn Aker Barents en í síðustu viku tilkynnti Statoil að hann hefði komið niður á mikla olíulind í Barentshafi. Athyglisvert er að þetta gerist um hávetur, langt norðan heimskautsbaugs, þar sem nú er fimbulkuldi og myrkur allan sólarhringinn, víðfjarri mannabyggðum, um 200 sjómílur norðvestur af Hammerfest. Þetta leiðir hugann að aðstæðum á Drekasvæðinu, sem er heldur nær landi, og mun sunnar á hnettinum. Olíuleitin í Barentshafi sýnir jafnframt við hve hrikalegar aðstæður nýjustu borpöllum er ætlað að vinna en þegar við fylgdumst með smíði Aker Barents á eynni Storð í Noregi fyrir tveimur árum var okkur greint frá því að þessi fljótandi pallur gæti borað í ólgandi stórsjó í miklum frosthörkum á þriggja kílómetra hafsdýpi. Jafnframt væri gríðarleg áherslu lögð á varnir gegn umhverfisslysum og öryggi mannskapsins um borð. Slíkir pallar eru hins vegar ekki á lausu því samkvæmt helsta netmiðli Noregs um olíuiðnaðinn, offshore.no, er búið að ráðstafa flestum borpöllum mörg ár fram í tímann. Þannig er Aker Barents bókaður í verkefni fram yfir mitt ár 2014.

Þetta hefur jafnframt leitt til þess að aukinn kraftur hefur verið settur í smíði nýrra borpalla og segir netmiðillinn að 70 fljótandi leitarpallar séu nú smíðum víðsvegar um heim. Þannig er norska fyrirtækið Oddfjell Drilling að láta smíða fjóra palla eins og þennan hér, sem ber heitið Deepsea Atlantic, en þeir virðast eins og klæðskerasniðnir til að ráða við aðstæður eins og á Drekasvæðinu, heimskautaslóðir með miklu hafsdýpi.