Strax i leikskóla eftir fæðingarorlof

Þingmenn Vinstri grænna á Alþingi lögðu fram þingsályktunartillögu í haust um leikskóla að loknu fæðingarorlofi. Tillagan var samþykkt með nokkrum breytingum á Alþingi í vikunni.

Samkvæmt henni á að skipa starfshóp á vegum menntamálaráðuneytisins og Sambands íslenskra sveitarfélaga.

Starfshópurinn á að greina faglegar kröfur og fjárhagsleg sjónarmið sem taka þarf tillit til fari sveitarfélögin að bjóða börnum á aldrinum eins til tveggja ára upp á leikskólavist. Kanna á hver húsnæðisþörfin yrði og hversu marga nýja starfsmenn þyrfti að ráða. Hópurinn á að skila tillögum til ráðherra fyrir ágústlok á næsta ári.

Í umsögn sem Samband íslenskra sveitarfélaga sendi inn vegna tillögunnar segir að markmiðið sé góðra gjalda vert en óhugsandi sé að hrinda tillögunni í framkvæmd án ítarlegs kostnaðarmats og samráðs við sveitarfélögin. Það myndi kosta sveitarfélögin gríðarlega fjármuni ef það yrði lögfest að öll börn ættu rétt á leikskólaplássi frá eins árs aldri. Sambandið segir að líklega yrði að hækka hámarksútsvar eða hækka gjaldskrá leikskóla töluvert og færa nær raunkostnaði.

Raunkostnaður við hvert leikskólapláss á mánuði miðað við átta tíma vistun sé um 143 þúsund krónur á mánuði.

Reykjavíkurborg hefur látið skoða kostnaðinn af því að taka börn á aldrinum eins til tveggja ára inn á leikskóla. Í skýrslu sem borgin gaf út fyrir rúmu ári kemur fram að það myndi kosta borgina rúmlega 1,2 milljarða króna að taka öll börn inn á leikskóla sem eru fædd á tímabilinu janúar til og með júlí 2011 fyrir utan kostnað vegna framkvæmda.

Stöðugildum í leikskólum myndi fjölga um allt að 224 og stöðugildum leikskólastjóra um 12 ef byggðir yrðu 6 ungbarnaleikskólar. Einnig mætti gera ráð fyrir að 18 til 90 störf myndu skapast við hönnun og eftirlit og 42 til 210 störf við framkvæmdir til skamms tíma. Þá kemur fram í skýrslunni að ætla megi að börnum hjá dagforeldrum myndi fækka um 400 og dagforeldrum myndi fækka um helming.