Tafir á jólapósti vegna veðurs

Tafir hafa orðið á dreifingu á jólapóstinum vegna vonskuveðurs sem geysað hefur um landið. Fáir póstdreifingarbílar komust á áfangastaði í gær en aukaferðir verða farnar á annan í jólum.

„Póstbílarnir sem áttu að fara frá Reykjavík í gær, fóru ekki nema á Hellu, Hvolsvöll og Selfoss og svo Akranes og Borgarnes. Aðrir bílar fóru ekki úr bænum,“ segir Brynjar Smári Rúnarsson, forstöðumaður markaðsdeildar Póstsins.

Þannig að fólk annars staðar á landinu má eiga von á töfum á jólapóstinum?

„Já, við förum aukaferð á annan í jólum sem var ekki fyrirhuguð svo pósturinn kemst væntanlega til skila á föstudaginn en allur póstur sem var sendur fyrir eða á síðasta skiladegi er kominn á afgreiðslustaði og væntanlega er búið að bera þann póst út.“

Sumir hafa spáð endalokum jólakortsins vegna útbreiðslu rafrænna miðla en Brynjar er á öðru máli.

Hvað senda Íslendingar mikið af jólakortum?

„Þetta eru tvær og hálf milljón í ár, sem er mjög svipað og í fyrra. Þessi skemmtilega hefð er ennþá í fullu gildi hjá okkur,“ segir hann.

Íslendingar eru 320 þúsund talsins svo fyrst þeir senda tvær og hálfa milljón jólakorta má gera ráð fyrir því að hver þeirra sendi og fái átta kort að meðaltali. Úburður heldur áfram eftir því sem veður leyfir á hverju landsvæði.

Og eruð þið ennþá á fullu að dreifa því sem eftir er?

„Já, pósthúsin voru opin í morgun og svo er útburður á fullu á höfuðborgarsvæðinu og á þeim stöðum sem pósturinn komst til skila á í gær. Svo er útskeyrslan á fullu í dag líka, til klukkan tvö.“