Telur ekki grundvöll fyrir málsókn gegn sér

Halldór Kristjánsson, fyrrverandi bankastjóri Landsbanka Íslands, segir að Landsbankinn hafi keypt ábyrgðartryggingu í Bretlandi fyrir starfsfólk sitt. Slitastjórn bankans hafi tilkynnt hlutaðeigandi tryggingafélagi að hún telji að kröfurnar falli undir trygginguna. Þetta kemur fram í orðsendingu sem Friðjón Örn Friðjónsson, lögmaður Halldórs sendi fjölmiðlum.

Slitastjórn og skilanefnd Landsbankans hyggst stefna fyrrverandi stjórnendum Landsbankans og krefjast 37 milljarða af þeim Halldóri og Sigurjóni Árnasyni, fyrrverandi bankastjórum bankans. Ástæðan er sú að slitastjórnin telur að bankastjórarnir fyrrverandi hafi gerst sekir um vanrækslu. Lögmaður Halldórs segir að hann telji að ekki sé grundvöllur til kröfugerðar í þeirri mynd sem fram er komin. Hann hafi, ásamt lögmanni sínum, óskað eftir samstarfi við slitastjórn til að yfirfara nánar þau tvö mál sem slitastjórn hefur gert að álitaefni.

Lögmaður Halldórs segir að hann hafi hvorki átt hlut að né persónulega hagsmuni að þeim ákvörðunum sem slitastjórn og skilanefnd hafi til umfjöllunar. Hagsmunir hans hafi alfarið verið þeir sömu og bankans sjálfs og allar ákvarðanir havi verið teknar með hagsmuni bankans að leiðarljósi.