Þarf að auka öryggi á Geysissvæðinu

„Maður á náttúrlega að passa þetta lítil börn. Það liggur alveg fyrir því að það er þarna hiti sem vellur upp úr allskonar holum," segir Drífa Kristjánsdóttir, oddviti Bláskógarbyggðar. Geysir í Haukadal er í Bláskógarbyggð en þar slasaðist tveggja ára gömul telpa í gær þegar að hún datt í heitt vatn sem hafði fallið úr hvernum Strokki. Drífa segir að slys af þessu tagi séu sem betur fer sjaldgæf.

Drífa hefur að undanförnu unnið að því að reyna að koma málum tengdum Geysissvæðinu í betra horf. Hún hefur meðal annars verið í sambandi við Umhverfisstofnun. Drífa segir mikilvægt að setja upp skilti sem vari við hættunni af hverunum. Vinna þurfi að því að gera svæðið bæði öruggara og enn fallegra.

Ein af hindrununum sem Drífa stendur frammi fyrir í þeirri vinnu sinni er að ekkert eitt ráðuneyti ber ábyrgð á Geysissvæðinu. Þá er svæðið í eigu fjölmargra aðila. Ríkið á svæðið í kring en þarna er svæði sem er einnig í eigu einkaaðila. Drífa segir að það hafi lengi staðið til hjá ríkinu að gera samninga um svæðið en ekki hafi orðið úr því ennþá.