Þrefalt meira nikótín í íslenska neftóbakinu en í sænska snusinu

Næstum því þrefalt meira nikótín er í íslensku neftóbaki en í sænska munntóbakinu. Gífurleg aukning hefur verið neyslu munntóbaks hjá ungum karlmönnum síðustu ár en um 15% íslenskra karlmanna á aldrinum 18 til 24 ára nota tóbak í vör daglega.

Sala á íslensku neftóbaki rúmlega tvöfaldaðist á sjö ára tímabili, frá árinu 2003 til 2010 - fór úr 11,7 tonnum upp í 25,5 tonn. Á Íslandi er bannað að selja munntóbak og því hafa þeir sem taka tóbak í vör ekki úr öðru að velja en að neyta íslensks neftóbaks.

Sænska „snusið" er mjög vinsælt hjá tóbaksneytendum á Norðurlöndunum - bæði er hægt að fá það í pokum og í lausu, líkt og íslenska tóbakið er. En það sem fæstir vita er að næstum því þrefalt meira nikótín er því í íslenska.

Samkvæmt upplýsingum frá ÁTVR er um 2% nikótín í íslenska neftóbakinu en í sænskri General munntóbaksdollu í lausu er 0,75% nikótín. Það gefur auga leið að þeir sem neyta íslenska tóbaksins verða háðari meira magns nikótíns en þeir sem neyta þess sænska.

Viðar Jensson, verkefnisstjóri tóbaksvarna hjá embætti Landlæknis, segir þetta mjög alvarlegt. „Mér finnst það, sérstaklega í ljósi þess að ungir karlmenn sem byrja að taka í vörina verða mjög háðir því," segir hann.

„Því miður hafa ekki legið fyrir upplýsingar um nikótín styrkinn í íslenska neftóbakinu, en grunur hefur leikið á að hann sé töluvert hærri en til dæmis í sænska snusinu. Við höfum miklar áhyggjur af aukinni neyslu ungra karlmanna á íslensku neftóbaki, sem munntóbaki, því þetta er viðbótar tóbaksneysla," segir hann.

Um áramótin verður gjald á íslenskt neftóbak tvöfaldað.

Frekari upplýsingar úr talnabrunni Landslæknis.