Tryggja réttindi fólks með kynáttunarvanda

Guðbjartur Hannesson velferðarráðherra mun mæla fyrir frumvarpi um réttarstöðu einstaklinga með kynáttunarvanda á Alþingi á eftir. Í frumvarpinu er kynáttunarvandi skilgreindur sem sú upplifun einstaklings frá unga aldri að hann telji sig hafa fæðst í röngu kyni og óskar að tilheyra hinu kyninu. Markmið laganna er að tryggja einstaklingum með kynáttunarvanda jafna stöðu fyrir lögum á við aðra í samræmi við mannréttindi og mannhelgi.

Í greinargerð með frumvarpinu segir að það sé samið af nefnd um réttarstöðu transfólks sem skipuð var af velferðarráðherra í mars í fyrra. Frumvarpið er gert í samræmi við samstarfsyfirlýsingu ríkisstjórnar Samfylkingar og Vinstri hreyfingarinnar - græns framboðs en þar skuldbindur ríkisstjórnin sig til þess að huga að réttarbótum í málefnum transgender fólks í samræmi við ábendingar umboðsmanns Alþingis.