Ármann Kr. Ólafsson bæjarstjóri Kópavogsbæjar segir að verð sem Sena greiddi fyrir leigu á Kórnum undir tónleika Justin Timberlake sé trúnaðarmál. Auk bæjarfulltrúa fengu makar bæjarfulltrúa boðsmiða á tónleikana en Ármann segir að boðsmiðar fyrir maka hafi verið vegna fjölskyldustefnu Kópavogsbæjar.
Kópavogsbær fékk 30 boðsmiða á tónleika Justin Timberlake. Tuttugu og tveir miðar fóru til bæjarfulltrúa og maka þeirra og átta fóru til starfsmanna bæjarins.
Í 6. gr. siðareglna fyrir kjörna bæjarfulltrúa og stjórnenda hjá Kópavogsbæ segir orðrétt: „Óheimilt er að þiggja gjafir, fríðindi eða önnur hlunnindi frá viðskiptamönnum eða þeim sem leita eftir þjónustu Kópavogsbæjar, ef líta má á það sem endurgreiðslu fyrir greiða eða sérstaka þjónustu.“
Kópavogsbær hefur ekki upplýst hvað Sena greiddi fyrir leigu á Kórnum undir tónleika Justin Timberlake. Ef Sena hefur fengið afslátt af leiguverði Kórsins vegna tónleikanna gæti það fallið undir greiða í skilningi siðareglna bæjarins.
Talsverð röskun fylgdi tónleikunum enda voru þeir stórir að umfangi. Þannig þurfti að takmarka umferð um tónleikasvæðið fyrir og eftir tónleikana. Þá var húsnæðið eðli málsins samkvæmt ekki í notkun undir íþrótta- og æskulýðsstarf í um það bil viku vegna undirbúnings tónleikanna.
Óskaði eftir miðum að fyrra bragði
Ármann Kr. Ólafsson bæjarstjóri Kópavogsbæjar segist hafa beðið Senu um miða á tónleikana með það fyrir augum að sjá hvernig tónleikarnir heppnuðust og meta notagildi hússins með framtíðar tónleikahald í huga.
„Ég óskaði eftir því að fulltrúar eigenda hússins fengu að vera þarna,“ segir Ármann í samtali við fréttastofu.Makar bæjarfulltrúa fengu líka boðsmiða á tónleikana.
Voru þá makar bæjarfulltrúanna þarna til að meta framtíðarnotkunarmöguleika Kórsins? „Það er nú þannig að tónleikarnir voru á sunnudagskvöldi og það er kannski partur af okkar fjölskyldustefnu að makar komi með. Mér finnst það eðlilegt,“ segir Ármann.
Fékk Sena afslátt af leigunni af Kórnum? „Verðskrá miðast við gjaldskrá Kórsins og Fífunnar. Þannig að það er ekki um neitt slíkt að ræða. Þar fyrir utan var gengið frá þessu á síðasta kjörtímabili fyrir einu ári síðan.“
En fékk Sena afslátt? „Þeir fengu verð sem tók mið af gjaldskrá Kórsins og Fífunnar.“
En fékk Sena afslátt? „Þetta er svarið sem ég hef. Þetta (verðið innsk.blm) tekur mið af því og ekkert hægt að svara því frekar. Verðið er trúnaðarmál.“
Hvers vegna borgaði ekki Kópavogsbær fyrir miðana ef þið þurftuð að vera þarna til að meta framtíðarmöguleika hússins? „Að fara að eyða peningum úr bæjarsjóði svo bæjarfulltrúar fái aðgang að húsnæði bæjarins? Ég tímdi því ekki.“
Síðar í dag, eftir að viðtalið var tekið upp, fullyrti Ármann að Sena hefði greitt hærra verð fyrir leigu á Kórnum en íþróttafélög greiða fyrir hefðbundna notkun hússins, eins og knattspyrnuleiki en gaf ekki upp hvaða verð hafi verið greitt. Þess ber að geta að hefðbundið verð fyrir dags leigu á Kórnum undir knattspyrnuleiki er um 300.000 krónur, samkvæmt upplýsingum fréttastofunnar. Sena var með húsið á leigu í um viku.
„Frábærar fréttir, ég er klár ásamt maka“
Málið tengt boðsmiðum bæjarfulltrúa komst upp eftir að Sigurjón Jónsson varabæjarfulltrúi Framsóknarflokksins í Kópavogi lagði fram fyrirspurn um málið í bæjarráði.
Eins og greint var frá í Fréttablaðinu í dag hafði þó Sigurjón sjálfur þegið boðsmiða á tónleikana í tölvupósti til Ármanns bæjarstjóra en fengið þau svör að boðsmiðar væru í boði fyrir aðal bæjarfulltrúa og maka þeirra eingöngu.
Í fréttum Stöðvar 2 í kvöld sagðist Sigurjón hafa gert mistök og ekki hafa gert sér grein fyrir að slíkt gæti mögulega farið gegn siðareglum bæjarins.
