Innlent

Var þakinn bólum eftir kláðamaur

Elimar Hauksson skrifar
Á myndinni sjást hvernig útbrot myndast af kláðamaurnum.
Á myndinni sjást hvernig útbrot myndast af kláðamaurnum.
Móðir 19 ára drengs segir son sinn hafa verið þakinn bólum og útbrotum eftir að hann fékk kláðamaur. Hún segir son sinn hafa stundað ljósabekki mjög mikið á þeim tíma sem smitið kom upp og heldur því fram að hann hafi smitast í ljósabekk.

Móðirinn vildi ekki koma fram undir nafni enda segir hún málið viðkvæmt fyrir son sinn. Hún segir smitið hafa verið stórmál enda hafi þurft að þrífa öll föt af drengnum, og þrífa herbergið hátt og lágt, auk þess sem hann hafi þurft að vera þakinn smyrsli í nokkra daga.

„Fyrst sáum við bara litlar bólur á honum og héldum að hann væri að fá ofnæmisviðbrögð en síðan var þetta komið útum allt. Þetta var alveg hræðilegur tími fyrir strákinn,“ segir móðirin. Hún bætir við að ljósabekkjastofur verði að vera meðvitaðar um kláðamaurssmit og ekki sé nóg að þrífa bara bekkina á milli viðskiptavina.

„Það þarf náttúrulega að sótthreinsa þessa bekki, koddana og gleraugun sem fólk notar. Mér dettur ekki í hug að fara nokkurn tímann aftur í ljós eftir að hafa séð son minn.“

Hélt áfram í ljósum eftir smitið

Húðsjúkdómalæknir sem Vísir ræddi við sagði það vel mögulegt að kláðamaur smitist í ljósabekkjum en slíkt sé þó erfitt að rekja. Maurinn geti bæði smitast við kynmök og eftir öðrum leiðum.

Móðirin segist meðvituð um aðrar smitleiðir en henni þykir ólíklegt að smitið hafi komið upp eftir öðrum leiðum enda hafi sonurinn verið einn í herbergi á þessum tíma og enginn annar í fjölskyldunni hafi smitast. Smitið hafi því komið annars staðar en frá heimilinu.

„Fyrir utan það að sonur minn hélt áfram að fara í ljós eftir smitið enda vissi hann ekkert að hann væri með kláðamaur. Það gæti því verið að hann hafi smitað aðra án þess að vita það,“ segir móðirin.

Mikilvægt að leita sér meðferðar

Kláðamaur telst til skráningarskyldra sjúkdóma en hjá embætti Landlæknis fengust þær upplýsingar að samkvæmt mælingum hér á landi sé aukning í smiti á kláðamaurs.  Árið 2010 voru 138 skráð smit en árið 2013 voru þau hins vegar 288.

Ása Atladóttir, sérfræðingur í sýkingavörnum hjá embættinu segir mikilvægt að leita sér meðferðar, verði fólk vart við einkenni kláðamaurs.

„Læknar hafa sumir hverjir áhyggjur af kláðamaurnum af því hann getur orðið vandamál. Þetta er eitthvað sem lagast ekki af sjálfu sér heldur þarfnast meðferðar. Þeir sem fá einkenni um smit þurfa að leita til læknis og fá ávísuð lyf til að uppræta smitið svo það breiðist ekki út,“ segir Ása.

Á vefsíðu landlæknis eru upplýsingar um kláðamaur og hvernig bregðast á við smiti en hægt er að nálgast upplýsingarnar HÉR.






Fleiri fréttir

Sjá meira


×