Varaformaður SA: Stjórnvöld eiga að gefa atvinnulífinu vinnufrið

Varaformaður Samtaka Atvinnulífsins vill að stjórnvöld gefi atvinnulífinu vinnufrið í stað þess að standa sífellt í vegi fyrir uppbygginu með tortryggni. Núverandi atvinnuleysi kostar atvinnulífið 20 milljarða króna á ári.

Samtök Atvinnulífsins stóðu í dag fyrir umræðufundi um hvernig nýta megi sóknarfæri í atvinnulífinu. Á fundinum lýsti formaður samtakanna Vilmundur Jósefsson óánægju sinni með aðgerðir ríkisstjórnarinnar og sagði samtökin ekki geta treyst orðum hennar né skriflegum yfirlýsingum þar sem aldrei sé við þær staðið. Þá sagði hann sjálfgefið að Samtök atvinnulífsins myndu ekki hafa frumkvæði að neinum frekari samskiptum við ríkisstjórn Jóhönnu Sigurðardóttur.

Á fundinum vakti varaformaður samtakanna einnig athygli á kostnaði atvinnuleysis fyrir atvinnulífið.

„Það er auðvitað atvinnulífið sem stendur straum af atvinnuleysisbótum í gegnum atvinnuleysistryggingarsjóð og í dag er atvinnulífið að greiða 20 milljarða króna á ári vegna atvinnuleysis sem er gríðarlegur kostnaður sem gæti annars nýst til uppbyggingar í fyrirtækjunum," sagði Grímur Sæmundsen, varaformaður SA.

Hann segir stjórnvöld sífellt bregða fæti fyrir uppbyggingu atvinnu, til dæmis með því að fæla frá áhugasama fjárfesta með tortryggni

„Alltaf þegar eitthvað kemur upp er sett spurningarmerki hvort að áhugi fjárfestanna sé ekki eitthvað annarlegur eða það sé einhver fiskur undir steini í stað þess að reyna að vinna með þeim aðilum sem sýna áhuga á að fjárfesta hér og taka þátt í að byggja upp atvinnulífið," sagði Grímur.