Víkingaheimar í Reykjanesbæ voru formlega opnaðir í gær á þjóðhátíðardaginn 17. júní. Til þeirra teljast sýningarskáli Íslendings sem Guðmundur Jónsson arkitekt hannaði og sýningin Víkingar Norður-Atlantshafsins sem sett er upp í samvinnu við Smithsonian-stofnunina í Bandaríkjunum.
„Meðal sýningargripa eru vopn víkinga sem grafin voru upp í Svíþjóð og eru talin vera frá því í kringum árið 800," að því er fram kemur í tilkynningu frá Víkingaheimum. Þar segir að vopnin séu fengin að láni frá Þjóðminjasafni Svíþjóðar. „Einnig eru í sýningunni aðrir ómetanlegir munir, svo sem grafsteinar frá svipuðum tíma og koma munirnir víða að m.a. frá Skandinavíu löndunum, Englandi, Færeyjum og Grænlandi."
Aðstandendur segja að opnun Víkingaheima sé mikill áfangi í menningartengdri ferðaþjónustu í landi og mikil viðbót við fjölbreytta ferðaþjónustu á Reykjanesinu. Víkingaheimar verða opnir öllum, alla daga frá 11:00 til 18:00 og allar upplýsingar er hægt að fá á heimasíðunni www.vikingaheimar.com
