Flottustu Mustang bílarnir landsins til sýnis í dag

Mustang sýningin opnaði klukkan 10:00 i morgun og þá strax var komið fullt af fólki til að berja bílana augum. Sýningin fer fram í sal Brimborgar í Ford salnum að Bíldshöfða 6 í Reykjavík. Um 35 bílar eru á sýningunni.

Hilmar Jacobsen er gjaldkeri íslenska Mustang klúbbsins.

„Hér er bara allt fullt af fólki og allir að horfa á og skoða fallegustu Mustangana á Íslandi. Þetta er mjög flott og skemmtileg sýning, eitthvað sem engin má missa af því þarna færðu bara allar kynslóðir af Mustang, dýrustu, flottustu og sjaldgæfustu Mustganga, sem þú sérð yfirleitt aldrei og ef þú ert heppin þá sérðu kannski einn, tvo eða þrjá af þeim á sumri en þarna getur þú skoðað þá alla á einu bretti,“ segir Hilmar.

Á meðal bílanna er elsti Mustang landsins, sem var framleiddur í maí 1964 og á sýningunni er líka nýjasti Mustanginn, sem er frá 2021.

En hvað er svona merkilegt við þessa bíla, Mustang?

„Mustang er náttúrulega bílategund, sem hefur verið framleidd stanslaust frá 1964 og hefur verið notuð í hundruð bíómynda og öðru. Þetta eru bara rosalega fallegur bíll, sem allir þekkja. Mustang, þegar þú heyrir það, þá dettur þér bara í hug ógeðslega flottur bíll. Þetta er bara lífsstíll að eiga Mustang,” bætir Hilmar við.

Og Hilmar á von á miklum fjölda á sýninguna í dag, sem stendur til klukkan 16:00.

„Það er frítt inn og það verður gos og nammi á meðan birgðir endast. Það er eins og ég segi, ég býst bara við hátt í fjögur þúsund manns hérna í dag,” segir Hilmar.