Upplýsandi fundur í Stjórnarráðinu

„Það var verið að kynna okkur ákveðnar sviðsmyndir sem Fjármálaeftirlitið og Seðlabankinn hafa verið að setja upp í framhaldi á dómi Hæstaréttar. Þær voru misdökkar eftir því hvaða forsendur voru gefnar," segir Vilhjálmur Egilsson, framkvæmdastjóri Samtaka atvinnulífsins.

Hann sat fund í Stjórnarráðinu seinnipartinn í dag ásamt forsætis-, fjármála-, efnahags- og viðskiptaráðherra, ráðuneytisstjóra efnahags- og viðskiptaráðuneytisins og fulltrúum verkalýðshreyfingarinnar, Sambands íslenskra sveitarfélaga, Seðlabankans og Fjármálaeftirlitsins. Fundarefnið var dómur Hæstaréttar sem komst að þeirri niðurstöðu í síðustu viku að gengistrygging lána væri ólögleg.

Fundurinn var afar upplýsandi, að sögn Vilhjálms. „Þetta var fyrst og fremst kynningarfundur. Auk þess skiptust menn á skoðunum um hvernig væri best að snúa sér í þessu."

Vilhjálmur segir að eyða þurfi óvissunni sem allra fyrst. „Það er að okkar mati brýnt að það komi fljótt fram einhver lína um hvernig fjármálafyrirtækin ætla að taka á þessu máli."