Barnamálin erfiðust

Næturvaktir lögreglunnar á Hverfisgötu geta verið erilsamar um helgar, en Sindri Sindrason fékk að fylgjast með einni slíkri vakt síðustu helgi fyrir Ísland í dag. Á vaktinni voru fimmtán manns á sjö bílum, og ýmis verkefni komu á þeirra borð.

Ekki alltaf kallarnir á bak við heimilisofbeldismál

Fyrsta símtal vaktarinnar var um heimilisofbeldismál. Páll segir að þá sé kallað til barnaverndarnefndar og félagsráðgjafa. Hann segir að slík mál séu ekkert algengari um helgar en aðra daga.

Það sé ákveðin staðalímynd í slíkum málum að kallinn sé alltaf að berja konuna.

Páll segir allan gang vera þar á, einnig sé hringt vegna kvenna sem lemja mennina, foreldra að beita börn sín ofbeldi, börnin jafnvel gangi berseksgang og beiti foreldrana ofbeldi. Það venst aldrei að ganga inn í svona aðstæður, segir Páll.

Oftast reynir lögreglan að róa heimilisfólk svo handtaka verði ekki nauðsynleg. Það á við í öðrum aðstæðum líka. Lögreglan stígur inn í til að hjálpa, róa, en stundum gengur það ekki og þá endar fólk hjá Brönku fangaverði.

Branka er frá Sarajevó, en hefur búið á Íslandi síðan 1998. Hún hefur verið fangavörður hjá lögreglunni síðustu 18 ár, en hún var lögreglukona í heimalandi sínu. Hún getur verið hörð í horn að taka, en byrjar alltaf á því að vera kurteis við fangana. „Við gleymum því ekki að þetta er fólk, og við erum góð. Allir eru góðir hérna,“ segir hún.

Hún kann vel við sig á Íslandi og á Hverfisgötunni.

Vill að börnunum líði sem best

Páll varðstjóri segir að málin sem láti honum líða verst séu yfirleitt mál sem tengjast börnum.

„Maður er sjálfur foreldri, og það er viðkvæmt, maður vill gera það vel og vill að börnunum líði sem best. Öll mál þar sem börn koma við sögu eru erfið,“ segir hann.

Erfið mál geta setið í fólki, og lögreglumenn eru duglegir að ræða saman um erfiðar upplifanir, og einnig við sálfræðinga.

Umræðan oft ósanngjörn

Páll segir að ofbeldi gegn lögreglumönnum sé algengt.

„Það eru margir lögreglumenn sem verða fyrir árásum á hverju ári, en við reynum að tækla málin af eins miklu öryggi og við getum. Förum varlega inn í aðstæður,“ segir hann.

Sindri þáttastjórnandi segir áhugaverða breytingu hafa orðið frá fyrri þáttum þar sem hann fylgdist með störfum lögreglunnar, nú vilji mun færri lögreglumenn tjá sig.

Mörgum lögreglumönnum finnist umræðan oft ósanngjörn í þeirra garð. Þingmenn og fjölmiðlar séu oft óvægnir, segi hálfan sannleikann á meðan löggan getur ekki varið sig.

„Fólk verður að átta sig á að hér er fólk að fylgja lögum, reglum, taka við skipunum og stundum að sinna störfum sem fólk hér á bæ er ekki endilega sammála,“ segir Páll.

Hann segir að allir lögreglumenn séu að gera sitt besta. „Við erum að reyna vinna þetta af heilindum. Gagnkvæm virðing er bara besta meðalið, það er bara þannig,“ segir Páll varðstjóri.

Þáttinn í heild sinni má sjá hér að neðan, en þar fylgir Sindri lögreglunni í nokkur útköll næturinnar. Þeirra á meðal var innbrot, slagsmál í miðbænum, og útkall þar sem maður var að berja útidyrahurð með hamri.