Fram sagði upp samningi við Heimi

Stjórn handknattleiksdeildar Fram sagði í gær upp samningi við þjálfara meistaraflokks félagsins, Heimi Ríkarðsson. Heimir átti ár eftir af samningi sínum. Samkvæmt heimildum íþróttadeildar tekur Guðmundur Guðmundsson fyrrverandi landsliðsþjálfari og fyrrverandi þjálfari Fram, við starfinu. Frammarar vörðust allra frétta af málinu nú fyrir fréttir en líklega verður boðað til blaðamannafundar í dag og þá tilkynnt um ráðningu á nýjum þjálfara félagsins.